2026 жылғы 28 қазанда Астана қаласында университеттердің институционалдық дамуына, инновациялық экожүйелерді нығайтуға және зияткерлік меншікті басқаруға арналған семинар өтті. Іс-шараға Қазақстан Республикасы Ғылым және жоғары білім министрлігінің (ҒЖБМ), Жоғары білім беруді дамытудың ұлттық орталығының (ЖБДҰО), Дүниежүзілік зияткерлік меншік ұйымының (ДЗМҰ), Дүниежүзілік банктің өкілдері, халықаралық сарапшылар және университет өкілдері қатысты.
Қатысушыларға Қазақстан Республикасы Ғылым және жоғары білім вице-министрі Гүлзат Көбенова және Дүниежүзілік банктің Еуропа мен Орталық Азия өңіріндегі білім беру саласы практикасының жетекшісі Тоби Линден құттықтау сөз сөйледі.
Семинарда университеттердің инновациялық экожүйелерін дамытуға және зияткерлік меншік саласындағы ұлттық стратегияларға ерекше назар аударылды. ДЗМҰ сарапшылары Лин Вербауведе мен Меган Макканн университеттердегі инновациялық ортаны нығайту мәселелері бойынша баяндама жасады. Сарапшылар халықаралық тәжірибемен және университеттердің зияткерлік меншік жөніндегі саясатын әзірлеудің практикалық қырларымен бөлісті. Бұл саясат зерттеу нәтижелерінен бастап олардың экономикалық тиімділігіне дейінгі мәселелерді қамтиды.
Казпатенттің патенттік зерттеулер және технологиялар мен инновацияларды қолдау орталығының үйлестіру бөлімінің басшысы Ұлдана Шалабаева Қазақстанның ғылыми ұйымдары мен университеттерінде зияткерлік меншікті басқару ерекшеліктері туралы баяндама ұсынды.
Семинар университеттерді дамыту, зияткерлік меншікті басқару және ғылыми зерттеулер мен экономика арасындағы байланысты нығайту жөніндегі халықаралық тәжірибе мен практикалық тәсілдерді талқылауға арналған алаң болды.
